Pagbisita

Pagbisita ko sa iyo ang isa sa pinakamahirap na pagsubok ang aking naranasan. Mahirap kitang pa ibigin lalo na at may bahid ng pagkabalisa at pag aalinlangan, subalit napatunayan ko gaano kita iniibig.

Ninais kong puntahan kita, masaya ako sa nais ko subalit nandun ang kaba at pagkabalisa. Kaba ng dibdib kung paano ako haharap sa mga magulang mo. Paano ako magsisimula ng pakikipag usap sa kanila gayong hindi ko sila kilala. Saan ako magsisimula, saan ako hihinto, kailan ako magiging taya?

"Tao po" ang mga unang binigkas ko. Medyo natagalan ang paglabas ng tao sa loob ng tahanan subalit hindi nagtagal, lumabas siya at ako ay pinagbuksan. Pinaupo ako at tinawag ang ama ng tahanan. Nandun ang kaba sapagkat hindi ko alam paano ako magsasalita sa harap ng amang may iisang anak na babae,, ang babaeng aking iniibig.

Butterflies in my stomach. Yan ang nararamdaman ko. Bago ako magtuloy sa pagbiyahe kumain muna ako nang sa gayon pakainin man ako o hindi busog ako.

Humarap ang ama at ina, mahusay makitungo sa bisita. Makwento si ama habang malimit ang pagngiti at sandaling pagsasalita ang naibabahagi ng ina. Tumagal nang halos isang oras ang usapang iyon nang dumating ka.

Halos nag pigil ako ng pag ihi ng isang oras dahil di ko mapigil at maputol ang masarap na kuwentuhan namen ng kanyang ama. Sa iyong pagdating iniwanan nila tayo at sa wakas nakaihi rin ako.

Ipinara ako ng triycle iyong ama pauwi ng tahanan. Ang isa sa pinakamagandang nangyari sa aking unang pagdalaw sa iyo. Maraming salamat.

Kapag Kapiling Ka

Malamig ang paligid, tanging siyap ng mga sisiw, huni ng mga kuliglig ang maririnig at ingay mula sa bukas na bentilador ang nagbibigay buhay sa gabing iyon... Maliban sa atin.

Malamig ang gabi subalit ang init ng pagmamahal ay mababanaag sa atin. Ikaw at ako, nagkukuyom ang init sa pagyakap sa isat isa. Ang yakap na nagbibigay init sa nanlalamig nating mga kalamnan. Di ko na alintana gaano na katagal ang yakap na iyon sa mga sandaling tayo ay magkapiling subalit ramdam ko ang sandaling iyon ang naghahatid sa atin sa kawalang hangganan ng pag ibig.

Ikaw ang tanging pangarap. Pangarap na nagbibigay buhay sa aking daigdig. Wala na ngang aasamin pa aking giliw, kundi ang makapiling kang muli. Ang makasama kang Muli.

Kamalayan

Isang gabing mapang amo

Tanging ikaw lamang at ako

Sa isang higaang nakatikom

Pipi,bulag, bingi

Sa ating pagtagpo

Sa isang sulok ng mundo

Ikaw ang ninanais ko

Tanging ikaw giliw ko

Hangad ko sa bukas na ito

Tanging ikaw ang matanto

Tanging ikaw mayakap ko

Mahagkan mga labi mo

Sa sandadling ito

Nananabik sa yo

Giliw kong inaasam

Hanggang bukas ay dinarasal

Naway kamay mapasiphayo ko.

Ang ating Daan

   

Isang umagang kasing ganda ng  isang bulaklak

Ang makita ka ay isang ligaya

Sa pinagtagpong landas na ating tinahak

Isang marilag na bukas aking nababakas.

   

Tulad ng hagdang kay tarik kung tingnan

Sa bawat hakbang ko'y ligayang walang para

Narating ang kaitaasan, kasama ka aking rilag

Tunay na pag-asa ating natanaw talaga.

Tahanan ng langit, ating natanaw

Tahanang magbubuklod sa mga pusong mapagsinta

Tanging ikaw lamang laman ng isipan

Kapahingan tanging sa yo natatanaw 

Matapos ang pagod na ating dinanas

Kay sarap isiping natapos ang paglalakbay

Sa tuwina'y iisipin walang hanggan kapara

Kasama kang may ngiti nabuo itong araw

Katulad ng likong daan ating pinagmasdan

Kailanman ay di nasaring sumuko sa kapalaran

Magandang damong ligaw tanging nais matanaw

Maganda talaga ang ating naging araw.

Bagong Kabanata

Isang panibagong yugto ang aking kakaharapin sa buhay, ang pagiging isang lider ng paaralan. 

Inihatid ako ng aking mga kasamahan, kapwa punongguro at mga supervisors sa paaralang aking bagong paglilingkuran, Biyernes, Agosto 1. Bilang pag welcome sa akin, nandoon din ang chairman ng barangay at mga konsehal mga pinuno ng PTA at mga guro sa Atisan Elementary School. Hanggang sa ako na ang magbibigay mensahe bilang bagong pinuno ng paaralan. Marami akong nasambit subalit ito lang ang mga salitang tumatak sa akin at nagbigay ng kaligayahan, nang sambitin ko ang mga salitang, "... at marahil maari ko na ring masambit na magandang araw rin sa aking mga kapwa school heads." Ang saya ko lalo't nakita ko na nagtanguan sila na sumasaangyon na ako ay isa na rin school head. 

Natapos ang araw na iyon sa isang pagpupulong sa mga bagong guro na aking makakasama sa ilang panahon. Hindi naman ako bago sa Atisan, sapagkat unang destino ko bilang guro sa pampublikong paaralan, dito rin ako napapunta. Ngayon, bilang bagong head teacher, dito ulit ako dinala.Sana makapagdala ako ng magandang pagbabago sa paaralan ito.

Internet Connection

Umuwi akong may kalungkutan sa aking sarili. May tao akong nais makita. May tao akong gustong makita. May nais akong masilayan, subalit hindi ko nagawa...walang magawa.

Pagdating sa bahay, diretso lang ako sa aking higaan. Palibhasa,umaambon,malamig, hindi ko na ninais na kumain ng hapunan kahit ako ay inaalok ng aking ina sapagkat busog pa naman ako. Malungkot rin syempre. Ninais ko man na makausap ang taong gusto kong kausapin hindi nangyari.

Nagkaroon ng pagkakataon na makagamit ng internet. Sa aking palagay,magigigng masaya ako, subalit isang kabalintunaan. Mahina ang signal ng internet.

Pinipilit kong maka-connect muli upang makapag-unwind man lang. Maraming online na kaibigan sa mga oras na iyon, subalit pinatatakam lamang ako ng aking signal,mawawalan, magkakaroon. Gusto ko mang mangumusta sa taong gusto kong kausapin ang signal na ito ang hindi umaayon.

Minarapat ko na lamang na itigil na ang pagnanais na makausap ang nais kong kausapin, marahil abala rin sya kaya't gumawa na ng paraan ang internet connection na ipagpaliban ang pang-aabala ko sa kanya. 

Araw pa naman ng "kalayaan." Bilang isang mamamayang nakikinabang sa kalayaang nakamit mula sa pakikipaglaban ng ating mga bayani, na nagbuwis ng buhay, isang pagpupunyagi sa ating mga dakilang bayani. Salamat sa inyong inialay na buhay. Ang mga kabataan, matapos ang inyong pagsusumikap na makamit ang kalayaan, ay ang siyang magpapatuloy ng pangangalaga upang ang kalayaang nakamit at ipinaglaban ay manatili.

Isa pa, nananatili akong malaya,nabubuhay ng naayon sa aking kagustuhan. Ito kahit na humina ang koneksyon ng aking net sa araw na ito, ay dapat kong ipagpasalamat.

Ipinagpapasalamat ko ang mga ito.Gayundin,kahit sa konting sandali,nakausap ko ang taong nais kong kausapin.