Pananabik

Sa isang kaparangan, naroon ako. Naghihintay sa 'yo.

Magulo sa aking mundong ginagalawan. Nandun ang maraming pagkukunwari. Nandun ang maraming kabalintunaan at iilang kabutihan. Marami mang katotohanan ang sa aki'y lumipas hindi ko maalis ang maging pala-ibig, ang maging mapagmahal. 

Tahimik akong naghihintay. Sa bawat hakbang pauna, hindi kita maiwan,bagaman magkaiba ang hakbang ng ating pinanggagalingan. Narito ako, sa isang sulok ng kawalan. Pilit humihiwalay sa nakaraan, subalit umuusbong man, sa pag-iisa, sa gabing tahimik, ikaw ang napapadampi sa isipang nag-iisa.

Nalulumbay man, umaasa sa aking panunuyo sa isang ikaw ay mabubuo pa rin ang bukas na pinapangarap. Patuloy akong mangangarap, patuloy akong aasa, patuloy mong mararamdaman ang aking presensya, kung hanggang kailan, sa akin, walang hanggan. 

Asahan mong, mula ng ikaw ay makita ko, ikaw ang siyang itinatangi ng pusong ito.